உரூபா 500 பரிசு பெறும் பாடல் :

1.மொழிப்பற்றி லாதிருக்கு மினநெடுநா ணிலைத்திருத்தல் முடிந்தி டாது!
செழிப்புற்ற முன்னைமொழி செந்தமிழ்தன் நிலையிழந்து சீரும் கெட்டே
பழிப்புற்றுத் தாழ்ந்திழிந்தே பலவாறாய் அழிப்புறவும் பதைப்பே யின்றி
விழிப்பற்ற வித்தமிழர் வெவ்வேறு பொய்த்துய்ப்பில் வீழ்ந்தார் சாய்ந்தே!
- வயவாள்வலியன், விழுப்புரம்.

வெளியீட்டுக்குத் தேர்வுபெற்ற பாடல்கள் (தரவரிசைப்படி):

2.மொழிப்பற்றி லாதிருக்கும் இனம்நெடுநாள் நிலைத்திருத்தல் முடிந்தி டாது;
பிழைப்புக்கு வந்தமொழி பெருமையது பெற்றமொழி பிழையு டைத்தென்(று)
இழிப்புறவே பேசிடுவான் எழில்தமிழின் பெருமைசொனால் ஏதும் கேளான்;
பழிப்புடையான் என்புகவ்வப் பல்லிளிக்கும் நாயேஅப் பண்பி லானே!
- கி. சிவகுமார், விருத்தாசலம்.

3.பொழிகின்ற நல்மழையால் வேளாண்மை மிகப்பொலிந்து புகழ்பெற் றாலும்
கொழிக்கின்ற தொழில்துறையால் வல்லரசாய்ப் பட்டியலில் கொடிநட் டாலும்
எழில்கொஞ்சும் வான்நிலவில் ஏற்றமுடன் வாழ்ந்திடவே இடம்பெற் றாலும்
மொழிப்பற்றில் லாதிருக்கு மினநெடுநாள் நிலைத்திருத்தல் முடிந்தி டாது
- பாவலர் செ. பழனி, புதுச்சேரி.

4.செழிப்போடி ருப்பவனோ செயலாற்றும் திறத்தாலே சீரைக் காண்பான்,
விழிப்போடி லாதவனோ வீழ்ச்சியையே கண்டிடுவான் விடிவைக் காணான்
பழிப்புக்கே இடமளித்துப் பண்பட்ட தாய்மொழியைப் பயிலா விட்டால்
மொழிப்பற்றி லாதிருக்கு மினம்நெடுநாள் நிலைத்திருத்தல் முடிந்தி டாது.
- ஆ. குமாரசாமி, சென்னை.

5.அழிப்பதுமேன் அருந்தமிழை ஆங்கிலத்தின் அடிமையாகி ஆய்க; மண்ணில்
மொழிப்பற்றி லாதிருக்கும் இனம்நெடுநாள் நிலைத்திருத்தல் முடிந்தி டாது
விழிப்புற்றே வியன்தமிழில் விளைகல்வி விழைந்துகற்க வேண்டும் நன்றே!
செழிப்புற்றுச் செந்தமிழும் துறைதோறும் சிறந்தோங்கச் செய்க இன்றே!
- கலைமாமணி கோவி. கலியபெருமாள், புதுச்சேரி.

6.விழியிரண்டாய் விளங்குகின்ற இனம்மொழியைப் போற்றிடாது வேறா யெண்ணிப்
பழியாமல் மொழிக்கலப்பைப் பல்லிளித்துப் பாராட்டிப் பரிச ளிப்பார்
விழியொன்றில் நோய்வந்தால் மறுவிழியும் சிலநாளில் வீணாய்ப் போகும்
மொழிப்பற்றி லாதிருக்கு மினநெடுநா ணிலைதிருத்தல் முடிந்தி டாது.
- சு. சொக்கலிங்கம், புதுச்சேரி.

7.மொழிப்பற்றி லாதிருக்கும் இனம்நெடுநாள் நிலைத்திருத்தன் முடிந்தி டாது
பழியேந்திக் கிடத்தற்கோ பழந்தமிழை மறந்திட்டாய்? பழாய்ப் போனாய்
இழிவகற்றா தினியும்நீ இருந்திட்டால் எதிர்காலம் ஏற்கா துன்னை
எழிற்றமிழை ஏந்தாக்கி இனமானங் காத்திடுவாய் எழுவாய் இன்றே.
- புலவர் தங்க. ஆறுமுகன், சென்னை.

8.விழிப்பின்றிச் செயலாற்று வினைகளினால் நலமெதுவும் விளைந்தி டாதே!
ஒழிப்பதற்கே வகைசெய்யு மனங்களினால் பயனெதுவும் உண்டா காது
பழிதீர்க்கும் முயற்சியினால் பகைமைவந்து நலமெதுவும் பயந்தி டாது!
மொழிப்பற்றில் லாதிருக்கு மினநெடுநாள் நிலைத்திருத்தல் முடிந்தி டாது
- மாநி. புதுச்சேரி.

9.விழியிரண்டு மிழந்திருக்கும் வாழ்க்கையிலே இருயளன்றும் விடிந்தி டாது
பழியெண்ணு முளந்தனிலே பண்புடைய நற்குணமும் படர்ந்தி டாது
வழித்தடங்கள் மாறியபின் வரவேண்டு மிடமென்றும் வந்தி டாது
மொழிப்பற்றி லாதிருக்கு மினநெடுநா ணிலைத்திருத்தன் முடிந்தி டாது.
- புலவர். பூங்கொடிபராங்குசம், புதுச்சேரி.

10.மொழியாலே பொருளீட்டிக் கொழுத்தவர்கள் மிகுந்துவிட்டார் ஊட கங்கள்
வழியாக உணர்வுகளை யழித்திங்கு நற்றமிழை ஞால மெங்கும்
செழித்திடா தமிழ்த்திடுவார் நிறைந்திங்கு நிற்பதனால் சிதைந்த ழிந்து
மொழிப்பற்றி லாதிருக்கு மினம்நெடுநாள் நிலைத்திருத்தல் முடிந்தி டாது.
- அர. செல்வமணி, சத்தியமங்கலம்.

11. மொழிப்பற்றி லாதிருக்கு மினநெடுநாள் நிலைத்திருத்தல் முடிந்தி டாது
பழமைமிகு தமிழினமே பயன்மிக்க இக்கருத்தைப் பதிபாய் நெஞ்சில்
செழிக்கச்செய் செந்தமிழை ஒழித்துவிடு மொழிக்கலப்பை இழிவை நீக்கு
வழித்தோன்றல் அனைவருக்கும் மொழிப்பற்றை ஊட்டிநல்ல வழியைக் காட்டு
- புலவர் வி. திருவேங்கடம், புதுவை.

12. விழிப்பொடுவண் டமிழ்மொழிநம் முயிரெனக்காத் திடலேநம் விழைவா கட்டும்
அழிந்திடுமே தாய்த்தமிழு(ம்) அயல்மொழிச்சொல் கலப்பதினா(ல்) அதனால் தானே
நுழைந்துவிட்ட பிறமொழிச்சொற் களையெல்லாம் நீக்கிடல்நம் நோக்கா கட்டும்
மொழிப்பற்றி லாதிருக்கு மினநெடுநா ணிலைத்திருத்தல் முடிந்தி டாது.
- பாவலர் பொன். பசுபதி, புதுச்சேரி.

13. மொழிப்பற்றி லாதிருக்கு மினநெடுநா ணிலைத்திருத்தல் முடிந்தி டாது
மழுப்பலிலா வுண்மையிது மன்பதையில் முத்தமிழர் மானங் காக்கத்
தொழுதிடுவோம் தமிழ்த்தாயை; துரத்திடுவோம் தமிழ்ப்பகையைத் தூய நெஞ்சாய்
உழைத்திடுவோ மெல்லாரு மொன்றாவோம் தமிழ்காக்க உறுதி ஏற்போம்
- த. இரத்தினவேலு, புதுவை.

14. மொழிப்பற்றி லாதிருக்கும் இனம்நெடுநாள் நிலைத்திருத்தல் முடிந்தி டாது
மொழி,இனத்தின் குறியீடு! மொழியழிந்தால் இனமழியும் முற்றும் உண்மை
செழிப்புடனே தமிழரென வாழ்ந்திடவே விழைந்திடுவோர் செம்மை யாக
விழிப்புடனே தாய்மொழியாம் தமிழ்மொழியைக் கலப்பின்றி வளர்த்தல் வேண்டும்
- அசோகா. சுப்பிரமணியன், புதுவை.

15. செழிப்புற்று வளர்தமிழின் சீர்கெடவே வகையுளியில் செய்யுள் செய்தல்
பழிப்புக்கே இடமாகும் தமிழ்க்குடியில் கலையுணர்வு படைத்த மேலோர்
எழுத்திலும்தம் பேச்சிலும்போய் ஆங்கிலத்தை எடுத்தாளும் இழிவை ஒக்கும்
மொழிப்பற்றில் லாதிருக்கு மினநெடுநாள் நிலைத்திருத்தல் முடிந்தி டாது
- மு.இராம. கனகராசன், புதுச்சேரி.

16. விழியெனவே விளங்குகின்ற மொழித்துணையால் வேண்டியதை விரும்பப் பெற்றே
எழில்சூழ்ந்த உலகமதை ஏற்றவகை உயர்த்தியிங்கே எழுச்சி காணச்
செழித்துயர மொழிவளத்தால் வளர்ந்திடவே பெருமைகொண்டு சிறக்க வேண்டின்
மொழிப்பற்றி லாதிருக்கு மினநெடுநா ணிலைத்தித்தல் முடிந்தி டாது.
- கோ. கலியபெருமாள், புதுவை.

17. மொழிப்பற்றில் லாதிருக்கு மினநெடுநாள் நிலைத்திருத்தல் முடிந்தி டாது
வழிப்பறிகள் செய்யும்கூட்டம் என்றைக்கும் நிலையாக வாழ்ந்தி டாது
குழிபறிக்கும் குள்ளநரிக் கூட்டமெலாம் கூண்டோடு குலைந்தே போகும்
பழியேதும் புரியாத மக்கனென வாழ்ந்திடுவோம் பாங்காய் நாமே!
- ப. நீலா, புதுச்சேரி.

முன்னரே பரிசு பெற்றறோரின் பாடல்கள் :

1.வழிகண்டு நடவாதார் முன்னேற முடியாது; வளமை யான
விழியிருந்தும் திறவாதார் விளக்கமுற முடியாது; விளங்கும் நல்ல
செழிப்பிருந்தும் சோம்பேறி நன்மையுற முடியாது; செம்மை யான
மொழிப்பற்றில் லாதிருக்கும் இனம்நெடுநாள் நிலைத்திருக்க முடிந்தி டாது!
- வே. இரா. சிவஞானவள்ளல், வேலூர்.

2.செழிப்புடனே விளங்குகின்ற நாடுகளில் தாய்மொழியின் சிறப்பை மக்கள்
விழிப்புணர்வைப் பெறும்விதமாய்ப் பரப்புகிறார் மொழிப்பற்றை விழிக யளன்பார்!
மொழிப்பற்றி லாதிருக்கும் இனம்நெடுநாள் நிலைத்திருத்தல் முடிந்தி டாது!
பழித்தொதுக்கும் வரலாறும் உணர்த்திடடா தமிழ்மகனே பழிகொள் ளாதே!
- பாவலர் மா. வரதராசன், சென்னை.

3.விழிப்பற்று மயக்குற்று வீறிழந்து தடுமாறும் வீண ராகிச்
செழிப்புற்ற நம்மொழியாம் செந்தமிழைப் புறக்கணிக்கும் செயல்மேற் கொண்டு
பழிப்புற்று வாழ்கின்ற பழக்கத்தை நீக்குவதே பண்பா டாகும்.
மொழிப்பற்றி லாதிருக்கும் இனம்நெடுநாள் நிலைத்திருத்தல் முடிந்தி டாது.
- புலவர் மா.சு. மணி, திருக்கழுக்குன்றம்.

4.மொழிப்பற்றி லாதிருக்கு மினநெடுநா ணிலைத்திருந்ததன் முடிந்தி டாது
விழியின்றி மாந்தரினம் நெடுங்காலம் விளங்கிடுமேல் வியப்பே யாகு
மிழிவான வாழ்க்கையினை யினிதாகக் கொண்டுழலு மிவரெஞ் ஞான்றும்
பழிபூணத் துணிகுவரே யல்லாது பைந்தமிழ்க்குப் பயன்ப டாரே.
- சிலம்பூர்க்கிழான், கள்ளக்குறிச்சி.

5.செழிப்புற்று வாழ்ந்தோரும் செல்வங்காத் திறனின்றிச் சீச்சீ என்றே
இழிப்புற்று நிலைதாழ்ந்தே இழிவடைதல் இயல்பேயாம் இதிலேன் ஐயம்
மொழிப்பற்றி லாதிருக்கு மினநெடுநாள் நிலைத்திருத்தல் முடிந்தி டாது
விழிப்புற்று மொழிகாத்தும் இனங்காத்தும் முன்னேற்றம் விளையச் செய்வோம்.
- வே.ச. திருமாவளவன், புதுச்சேரி.